Zëvendëskryeministri i Kosovës, Enver Hoxhaj tha se Asociacioni i Komunave me shumicë serbe në Kosovë do të krijohet në bazë të Kushtetutës së Kosovës.
“Nuk do të lejojmë të krijohet Republikë serbe në Kosovë. Atje në veri jetojnë 30 deri 40 mijë serbë, në Kosovë në total jetojnë deri në 60 mijë serbë në gjithë Kosovën”, tha ai.
Sipas tij nuk dihet se kur do të mund të krijohet, por do të marrë kohë.
Hoxhaj ka folur edhe për tema të tjera të aktualitetit politik në vend. Ai tha se raporti i progresit të Komisionin Evropian për Kosovën i bërë publik dje përfshinë punën që kanë bërë institucionet gati për dy vite. “Në këtë dy vjeçar Kosova është ballafaquar me një bllokadë. Kishim dy palë zgjedhje, lokale dhe nacionale. Marrë në tërësi Kosova performon sikur shtetet e tjera të rajonit, sikur ekzistojnë për shumë vite. Ne duhet të kemi parasysh se ne jemi shtet qe 10 vite. Kosova është e fundit në rajon, pasi që jemi edhe shteti i fundit që kemi shpallur Pavarësinë. Ne jemi shumë të prirë të ecim në rrugën drejtë integrimeve evropiane”, tha ai për emisionin ‘MONITOR’, në televizionin publik.
“Në maj dihet koha kur liberalizohen vizat për Kosovën”
Hoxhaj tha se mesazhi kryesor në këtë raport është liberalizimi i vizave. ‘Dje kam pasur një telefonat nga komisionari Han, për neve ka mbetur të koordinohemi me shtetet. Ne kemi mbështetje nga Brukseli. Në javën e ardhshme Tusk do të vizitojë Kosovën. Ai do të takojë liderët e vendit. Ai do të sjellë mesazh të qartë për Kosovën”, tha ai.
Sipas tij raporti i Komisionin Evropian është real. “Në vitin 2018 tema kryesore e Kosovës është liberalizmi”, tha ai. Hoxhaj pret që procedurat për liberalizimin e vizave do të mund të kryhen në maj të këtij viti. “Vendimmarrja determinohet nga komisionari Dimitris Avramopoulos dhe Komisioneri Han. Vota që duhet të sigurohet 55 % të pranishme në Parlament, pra duhet të kemi 65 % e popullatës së BE-së”, tha ai. Sipas tij, Kosova duhet kërkuar përkrahjen. Për shtetet që nuk e kanë njohur Kosovën Hoxhaj beson se nuk do të nxjerrin probleme për Kosovën. “Ato nga fillimi e kanë ndjekur Kosovën deri në fund. Kosova i ka plotësuar 95 kritere. Shtetet e tjera i kanë plotësuar dyfishin më pak se Kosova. Këto vende nuk do të jenë problem”, tha ai. Hoxhaj ka vlerësuar se Kosovës i është bërë e padrejtë. “BE i ka dhënë liberalizim të votave Ukrainës, Moldavisë, Gjeorgjisë. Në fund të procesit na pret një punë. Duhet të punojmë në kryeqytete evropiane. 2018 është koha vendimtare për Kosovën”, tha ai.
“Kosova të ruajë partneritetin me të gjitha vendet”
Për arrestimin e depërtimin e gjashtë qytetarëve turq të akuzuar nga Turqia se janë pjesë e Lëvizjes së Gylenit, Hoxhaj tha se është debat i brendëshm. “Isha në Austri dhe askush nuk më përmendi atje. Ne duhet të ruajëm partneritetin me Bashkimin Evropian dhe shtetet e tjera”, tha ai. Hoxhaj vlerësoi se Qeveria e Kosovës duhet të dërgojë një platformë në Kuvendin e Kosovës për fazën e fundit të dialogut. “Duhet të kemi konsensus për temat nacionale. Demarkacionin është një shembull, si dhe të kemi unitet, pozitë e opozitë”, tha ai.
“UNMIK-u është pengesë e Kosovës”
Hoxhaj tha se UNMIK-u është një pengesë e madhe e Kosovës. ‘Përfaqësues të UNMIK-ut ndonjëherë flasin në emër të Kosovës. Jo në kuptimin faktik e diplomatik. Rasti konkreti është INTERPOL-i”, tha ai. Sipas tij UNMIK-u duhet të shndërrohet një zyre e OKB-së në Kosovë. “Duke i njohur meritat që i kanë bërë, 2018 duhet të shtrohet domosdoshmëria se sa gjatë duhet të qëndroj UNMIK-u në Kosovë”, tha ai. Hoxhaj tha se edhe raportet që bëhen nga UNMIK-u nuk janë reale.
“Në këtë vit do të themelohet ushtria”
Hoxhaj vlerësoi se koalicionin qeverisës është ndërtuar mbi premisave që do të trajtojë temat e mëdha. “Njëra ndër tema është Demarkacioni, prej kësaj teme duhet të prekim edhe tema të tjera, si dialogu, transformimi i FSK-së, që do të përmbyllet gjatë vitit 2018, Duhet të bindim komunitetin serb”, tha ai.