Zëvendësministri i Ministrisë së Punëve të Brendshme, Valdet Hoxha, priti në takim komisionerin e Këshillit të Evropës për të Drejtat e Njeriut, Nils Muižnieksme të cilin diskutuan lidhur me respektimin e të drejtave të njeriut, progresin institucional në kontekst të hetimeve të krimeve të urrejtjes, hetimin e rasteve ku gazetarët mund të jenë të kanosur, funksionimin e mekanizmave brenda policisë në çështjen e dëshmitarëve dhe lirinë e mediave.
Zëvendësministri Hoxha njoftoi Muižnieks lidhur me kornizën ligjore në dobi të mbrojtjes së të drejtave të njeriut, duke i marrë për bazë aktet themelore të të drejtave të njeriut, siç janë Deklarata Universale e të Drejtave të Njeriut, aktet tjera të bazuar në këtë deklaratën dhe Konventën e Këshillit të Evropës për Qasje në Dokumente Zyrtare e vitit 2009 etj.
Po ashtu zëvendësministri Hoxha e prezantoi progresin e arritur, aktivitetet në vazhdim si dhe objektivat e planifikuara nga Ministria e Punëve të Brendshme dhe agjencitë në kuadër të saj, lidhur me temat e diskutuara në takim, duke konstatuar një progres domethënës por edhe duke u zotuar se mbrojtja e të drejtave të njeriut do të jetë bazamenti i funksionimit të institucioneve tona.
Ndërsa, Muižnieks, e falënderoi zëvendësministrin Hoxha për pritjen dhe theksoi se do të jetë objektiv në hartimin e raportit të të arriturave nga fusha e të drejtave të njeriut.
Në këtë takim gjithashtu morën pjesë zv.drejtori i Zyrës së Komisionierit për të Drejtat e Njeriut, Nikolaos Sitaropoulos, si dhe dy këshilltarët e tij Erliha Bičakčić dhe Christian Mommers. /Telegrafi/