Basketbollisti amerikan kishte luajtur 10 vjet më parë në Serbi, me ekipin e Partizanit. Prandaj, ai nuk e ka harruar ende ekipin bardh e zi, e as vendin fqinj.
“Më kanë telefonuar që të luaj për ta. E di se do të luajmë vetëm në ligën vendore, por kjo është OK. E di se ka pasur luftë, por në Kosovë nuk më kanë pyetur asgjë tjetër pos basketbollit. Mendoj se duhet që të gjithë të duhemi, ne jemi të gjithë një familje e madhe. Mund vetëm të them se e dua Serbinë dhe Kosovën”, deklaroi 35 vjeçari për uebfaqen serbe b92.net, transmeton Express.
Tifozët e Partizanit nuk e kanë harruar ende Housen, i cili ka lënë gjurmë të pashlyeshme në Serbi, në periudhën kur luante, në dekadën e kaluar.
“Partizani do ta ketë gjithmonë një vend në zemrën time. Kam dashur të kthehem, por klubi ka zgjedhur lojtarë tjerë. Këto i ka basketbolli, ndërsa për mua është në rregull. Por, askush nuk mund ta largojë Partizanin nga zemra ime. Bardh e zi për tërë jetën”, ka shtuar House.
Ai e ka vizituar disa herë Beogradin për t’i përcjell ndeshjet e Partizanit në 12 vjetët e fundit. Ai thotë se tash do të mundohet që në Kosovë ta shfaq atë që di, falë kualitetit dhe përvojës që ka.
“Nuk e shoh veten si një emër të madh, por vetëm si Frederick Houese, të cilit i është dhënë edhe një rast. Njerëzit më kanë uruar çdo të mirë dhe unë do të mundohem t’ju jap çdo gjë nga vetja. I jam mirënjohës Partizanit, por edhe të gjithë njerëzve dhe qyteteve e klubeve, të cilët i kam njohur gjatë karrierës”, përfundoi House. /Telegrafi/