Kanë kaluar 23 vjet prej se janë ndeshur për herë të fundit dhe që të dy janë pensionuar profesionalisht, mirëpo Evander Holyfield beson se do të hyjë në ring me Mike Tysonin shumë shpejt.
‘Iron Mike’ mahniti me rikthimin e tij në meçin miqësor ndaj Roy Jones Jr më 28 nëntor, në duelin që përfundoi baras, megjithëse shumëkush mendon se Tyson ishte fitues.
Ishte dueli i parë i legjendës amerikane, 15 vite pas pensionimit (2005), ndërsa pritet që 54-vjeçari të hyjë sërish në ring në vitin e ardhshëm, kurse kundërshtar mund ta ketë rivalin më të madh, Evander Holyfield, të cilit ia kishte kafshuar veshin në njërin prej dueleve të mëhershme.
“Padyshim që kemi biseduar me ta (organizatorët). Duket se do të ndodhë. Le ta bëjmë. Kaq thjesht. Le ta bëjmë”, ka thënë 58-vjeçari për TMZ Sports.
Holyfield është ndeshur dy herë me Tysonin gjatë karrierës së tyre profesionale dhe në të dyja rastet e ka mposhtur. /Telegrafi/
