Policia e Durrësit ka reaguar në lidhje me zhdukjen e fëmijë 3-vjeçar, i cili iu mor të ëmës nga prindërit e ish-bashkëshortit dhe prej 4 ditësh nuk ka asnjë informacion në lidhje me vendndodhjen.
Policia bën me dije se ka ushtruar kontrolle intensive në banesën e gjyashërve, por ende nuk ka asnjë shenjë nga fëmija.
Gjyshi i tij, Rexhep Gjuni, 60 vjeç është proceduar penalisht nga policia, ndërkohë që kërkimet vijojnë.
“Specialistët për Hetimin e Krimeve të Komisariatit të Policisë Durrës referuan materialet në Prokurori ku nisi procedimi penal për shtetasin R. Gj., 60 vjeç, pasi më datë 13.04.2024, në këtë komisariat, është paraqitur një shtetase 23 vjeçe, banuese në Durrës, e cila ka kallëzuar se vjehrri i saj, shtetasi R. Gj., ka marrë fëmijën e saj 3 vjeç dhe nuk ia ka kthyer më.
Shërbimet e Policisë kanë ushtruar kontroll në banesën e shtetasit R. Gj., por nuk e kanë gjetur fëmijën. Vijojnë kontrollet intesive për gjetjen e tij.
Për ecurinë e kërkimeve dhe të veprimeve hetimore për këtë rast do të ketë njoftime të tjera në vijim”, thuhet në njoftimin e policisë.
Ishte e ëma e cila bëri denoncimin në polici, ku deklaroi se fëmija iu mor 4 ditë më parë nga prindërit e bashkëshortit të ndjerë dhe nuk iu kthye më.
Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprën penale “Marrja e padrejtë e fëmijës”. /Telegrafi/
