Në një aksident tragjik gjatë stërvitjeve, të shtunën ka ndërruar jetë boksieri Dwight Ritchie. Ai ishte 27 vjeçar.
Australiani ishte duke bërë sparing me Michael Zerafa në Melbourne, me ç’rast ka marrë një goditje fatale në trup që ka rezultuar me vdekjen e tij.
Gjatë karrierës së tij, Ritchie i ka zhvilluar 21 duele duke regjistruar 19 fitore, ndërsa ka humbur vetëm dy herë.
Humbja më e fundit e tij ishte në muajin gusht ndaj Tim Tszyu (djalit të ish-kampionit të botës, Kostya Tszyu), me të cilin u përball për titullin IBF Australasian të peshave super-të mesme të lehta. Dwight humbi me vendim të gjyqtarëve.
Ritchie ishte kampion në atë kategori, ndërsa në të kaluarën ka qenë kampion i titullit australian të peshave të mesme.
Ai ka pasur një fëmijëri të dhimbshme, duke qenë se ka arritur t’i mbijetojë dy herë kancerit. Boksieri lindi dhe u rrit në Shepparton të Victorias (shtet në juglindje të Australisë), ndërsa si foshnje ishte diagnostikuar me kancer.
Diagnoza e tij e parë ishte në moshën gjashtëmujore, të cilën e kaloi, por një vit më pas sërish u diagnostikua me sëmundjen vdekjeprurëse. Ai ia doli sërish t’i mbijetonte kancerit.
“Nuk mund ta imagjinoj dhimbjen që e kanë pasur nëna dhe gjyshja ime duke shkuar dhe duke i vizituar vazhdimisht mjekët në Melbourne. Fatmirësisht, që atëherë nuk ka pasur shenja të rikthimit”, kishte rrëfyer boksieri për sëmundjen e tij.
Mirëpo, më 9 nëntor 2019 nuk arriti që të rikthehej në jetë pas goditjes fatale që mori në trup duke i dëmtuar organet e brendshme. Të pranishmit u përpoqën t’ia jepnin ndihmën e parë dhe ta reanimonin, por pa sukses.
Ritchie pritej të kthehej në ring në muajin e ardhshëm (saktësisht më 6 dhjetor) në duelin ndaj Tommy Browne, të vlefshëm për titullin e peshave të mesme të lehta.
Ai ka lënë tre fëmijë pas vetes, ndërsa ekipi ‘Ellis Boxing’ ka nisur një fondacion për të grumbulluar fonde për t’i mbështetur financiarisht fëmijët e boksierit. /Telegrafi/