Kompania Rajonale e Ujësjellësit “Hidroregjioni Jugor” ka njoftuar se është bërë aftësimi i përkohshëm i pellgut ujëmbledhës te burimi i Soziut në Nashec të Prizrenit.
Si pasojë e dëmtimit në këtë pjesë, 14 fshatra të Hasit janë ballafaquar me probleme serioze sa i përket furnizimit me ujë të pijes.
KRU “Hidroregjioni Jugor” ka bërë të ditur se pas aftësimit të përkohshëm, është kërkuar që të bëhen edhe analizat e cilësisë së ujit dhe se pas rezultateve pozitive ka rifilluar furnizimi i rregullt me ujë të pijes për fshatrat e Hasit, raporton Telegrafi.
Gjithashtu “Hidroregjioni Jugor” ka theksuar se në bashkëpunim me nivelin lokal dhe atë qendror do të synohet gjetja e një zgjidhjeje afatgjate për pellgun ujëmbledhës te ky burim.
“Si Kompani do të vazhdojmë aktivitetet intensive, në bashkëpunim të ngushtë edhe me Komunën e Prizrenit dhe Qeverinë e Kosovës për përgatitjen e një projekti sa më profesional për zgjidhjen afatgjate të problemit të burimeve te Soziu në Nashec”, thuhet në njoftimin e KRU “Hidroregjioni Jugor”.
Lidhur me këtë çështje pat reaguar LVV-ja opozitare, duke akuzuar Komunën e Prizrenit se me punimet e saja në këtë zonë po e rrezikon furnizimin me ujë për 14 fshatra të Hasit.
Por këto pretendime janë hedhur poshtë nga kryetari i Komunës, Shaqir Totaj, i cili pat theksuar se problemi në këtë pikë ka qenë i mëhershëm dhe se nuk është shkaktuar nga operatori i kontraktuar nga qeveria komunale. /Telegrafi/