"I udhëhequr nga dy nga bankat më të mëdha dhe më prestigjioze në botë për transaksione të emetimit të titujve sovrane, JP Morgan dhe Deutsche Bank, ankandi i eurobondit tashmë ka filluar dhe pritet të përfundojë brenda kësaj jave", theksohet në njoftimin zyrtarë të ministrisë së Financave. Ministria thekson se asnjë pjesë e eurobondit nuk do të shkojë për të financuar deficitin buxhetor të këtij viti.
Pjesa më e madhe e tij mendohet të përdoret për të shlyer para kohe kredinë sindikale, të marrë në maj të vitit të shkuar, ndërsa sasia e mbetur do të shkojë për të zëvendësuar një pjesë të huamarrjes së brendshme afatshkurtër të marrë në tregun e brendshëm.
Sipas agjencisë ‘REUTERS’, që citon një nga menaxherët e huaj të eurobondi shqiptar, synimi i qeverisë sonë është të shesë eurobondet me një interes rreth 7.5 për qind. Ndërkohë, ligji lejon shitjen deri në kufirin maksimal të 8.5 për qind. Mali i Zi, i cili shfrytëzoi gjithashtu situatën pozitive, të krijuar në tregje pas largimit në kohë të krizës greke, po e shet eurobondin e vet prej 200 milionë eurosh me interes 7.48 për qind.
Sipas agjencisë së lajmeve REUTERS, eurobondi shqiptar vlerësohet nga kompania e njohur ndërkombëtare "Moody’s" me notën "B1". Poshtë nivelit BBB-, investimi konsiderohet si spekulativ", në gjuhën e financave ndërkombëtare. Në fakt, " B1 " si vlerësim qëndron tri shkallë më poshtë se sa nota " BBB-".
Kjo nuk do të thotë se eurobondi nuk do të gjejë treg. Përkundrazi, në tregjet financiare ka gjithnjë kapitale të lira. Problemi në këtë rast është ai se norma e interesit, që detyrohet të pranojë shteti emetues, është detyrimisht shumë më e lartë se vendet e sigurta, që dalin në treg me 1 për qind dhe më pak interes vjetor. /Telegrafi/