Guri përkujtimor i Pashke Markut, nënës që dogji veten në vitin 2003 pas kthimit dhe varrimit të mbetjeve të djemve të saj të vrarë e të djegur nga kriminelët serbë, është hequr para disa ditësh nga një pronë private në Korenicë të Gjakovës.
Lidhur me rastin, Policia bën të ditur se ka njoftuar Agjencinë për Menaxhim të Monumenteve Memoriale, transmeton Telegrafi.
“Fsh. Meje, Gjakovë 28.07.2023 – 11:22. Është pranuar informatë se në lokacionin e cekur është lëvizur një guri përkujtimor i cili ishte i vendosur në pronën e të dyshuarit mashkull kosovar. Në lidhje me rastin është njoftuar Agjencioni për Menagjimin e Monumenteve Memoriale”, njofton Policia.
Me vendim të prokurorit rasti vazhdon në procedurë të rregullt.
Ndryshe, Komuna e Gjakovës ka njoftuar të premten se e ka marrë nën përkujdesje gurin që simbolizon sakrificën e nënës Pashke Marku, duke e vendosur atë në afërsi të Kompleksit Memorial në Mejë.
Sipas njoftimit për media, ky gur përkujtimor është vendosur në një ambient publik në atë lokacion vetëm përkohësisht. /Telegrafi/