Pas vdekjes së kryetarit të Dibrës Ruzhdi Lata, këtë funksion për momentin e kryen Hekuran Duka, këshilltar nga radhët e BDI-së.
Duka është mjek specialist-urolog në Spitalin e Përgjithshëm në Dibër dhe deri më tani ka zëvendësuar kryetarin në mungesë të tij.
“Sipas ligjit Qeveria e Republikës së Maqedonisë duhet të mbajë seancë ku do të konstatoj gjendjen, më pas Këshilli i Komunës me shumicën e votave duhet të zgjedh ushtrues të përkohshëm të detyrës si kryetar komune. Në afat prej gjashtë muaj duhet të shpallen zgjedhje për kryetar të ri”, tha për AIM, Ili Mirzo, sekretar i komunës së Dibrës.
Ndryshe, Ruzhdi Lata i cili e kishte mandatin e tij të dytë për kryetar komune, pas një sëmundje të rëndë ndërroi jetë më 24 nëntor në moshën 65 vjeçare.
