Nënkryetari i Lidhjes Demokratike të Kosovës, Lutfi Haziri, i cili ka qenë edhe negociator në bisedimet Kosovë-Serbi, ka thënë se Qeveria e Kosovës nuk e ka ndaluar mbajtjen e zgjedhjeve të Serbisë në Kosovë, por i ka kushtëzuar.
“Qeveria nuk e ka ndalu mbajtjen e zgjedhjeve më 3 prill në Kosovë, Qeveria e ka kushtëzu mbajtjen e zgjedhjeve dhe ky është dallim i madh”, ka thënë Haziri.
Sipas tij, kryeministri Albin Kurti në mungesë të një marrëveshjeje ka kërkuar nga vendet e QUINT-it letërshkëmbim.
Sipas Hazirit, kërkimi i këtij letërshkëmbimit është risi që mund t’i thyejë parimet e negociatave të cilat, sipas tij, janë që Kosova nuk bisedon me Serbinë drejtpërdrejt, nuk bisedon pa ndërmjetës të garantuar, pa garancinë nga ShBA-ja dhe nuk bisedon në territor të Kosovës apo Serbisë por në një vend neutral.
“Kushtëzimi është me letërshkëmbim, kryeministri jonë i ka thënë QUINT-it që ne kërkojmë në mungesë të një marrëveshjeje të arritur, letërshkëmbim për çështjen e zgjedhjeve të tre prillit dhe kjo nënkupton një risi në proces. Letërshkëmbimi është risi që mund t’i thyejë parimet”, është shprehur Haziri, për Kallxo.com.
Mirëpo një gjë e tillë, sipas Hazirit, ka dëmtuar imazhin e politikës së Kosovës karshi vendeve të QUINT-it.
“Tërheqja strategjike e ka dëmtu imazhin e politikës së Kosovës karshi vendeve të QUINT-it pasi deri tani palët nuk kanë kushtëzu, ose pala jonë nuk e ka kushtëzu procesin e negociatave asnjëherë”, ka thënë ai.
Madje, Haziri ka theksuar se me një veprim të tillë Kosova do të shihet si fajtor në këtë çështje.
Kujtojmë se më 23 mars ambasadorët e shteteve të QUINT-it, ShBA, Britani e Madhe, Francë, Gjermani dhe Itali përmes një deklarate të përbashkët kanë thënë se Kosova duhet të krijojë kushte që qytetarët e Serbisë të votojnë në zgjedhjet e 3 prillit në mënyrë që të shmangen incidente të mundshme.
Sipas deklaratës së lëshuar, shtetet e QUINT-it kanë shprehur keqardhje që Kosova dhe Serbia nuk kanë gjetur marrëveshje për të garantuar të drejtën e votës për qytetarët serbë në zgjedhjet e 3 prillit.
Për më tepër, në reagim thuhet se vendimi i Qeverisë së Kosovës për të mos lejuar mbajtjen e këtyre zgjedhjeve është në kundërshtim me vlerat dhe parimet e shteteve të QUINT-it.
Më 3 prill 2022, Serbia mban zgjedhjet presidenciale dhe parlamentare për të cilat zyrtarët e lartë serbë kërkuan që ato të organizohen edhe brenda territorit të Kosovës.
Kërkesa e tyre ra në vesh të shurdhër pasi me këtë nuk u pajtuan krerët e institucioneve kosovare. Kryeministri, Albin Kurti, tha se për këtë duhet të ketë një marrëveshje mes dy vendeve.
Ndërkohë, Bashkimi Evropian njoftoi se shteti i Kosovës ka refuzuar një propozim të vendeve të QUINT-it.
Para zgjedhjeve në Serbi, presidenti Vuçiq ka thirrur një mbledhje të Këshillit Kombëtar të Sigurisë.
Pesë eprorë të Policisë së Kosovës në veri të vendit, janë parë në takimin e thirrur nga presidenti i Serbisë, Aleksandar Vuçiq, pas përfundimit të mbledhjes së Këshillit Kombëtar të Sigurisë.
Inspektorati Policor i Kosovës (IPK) ka njoftuar se ka marrë informacionet dhe është njoftuar zyrtarisht për pjesëmarrjen e eprorëve të Policisë së Kosovës në pjesën e veriut të vendit në takimin të cilin e thirri presidenti i Serbisë, Aleksandar Vuçiq.