Nënkryetari i LDK-së, Lutfi Haziri, ka thënë se po vazhdojnë të punojnë dhe të përmbyllin angazhimin lidhur me Kuvendin Zgjedhor.
Haziri pas mbledhjes së Kryesisë së LDK-së, para mediave, ka thënë se 355 delegatë e kanë konfirmuar pjesëmarrjen.
“Kryesia e LDK-së dhe kryetari Isa Mustafa po vazhdojnë të punojnë që të përmbyllet angazhimi lidhur me përgatitjen e Kuvendit për nesër. Ne me kryetarët e degëve finalizuam angazhimet tona për ndërtimin e një mobilizimi të delegatëve të LDK-së. 355 delegatë tashmë kanë konfirmuar pjesëmarrjen, do të kenë kushte pune dhe kushte konkurimi. LDK-ja po e përafron qëndrimin lidhur me mbështetjen e kandidatit që përfaqëson unitetin e të gjitha strukturave dhe unitetin politik të LDK-së. Natyrisht që në të njëjtën kohë garanton pjesëmarrje dhe konkurrencë për të gjithë ata që nesër formalisht i paraqesin kandidaturat në Kuvendin e nëntë zgjedhor”, ka thënë ai, përcjell Telegrafi.
Haziri ka thënë se pa LDK-në nuk ka as zgjedhje as zgjidhje.
“LDK nuk ka nevojë për spektakël, LDK ka nevojë ta konfirmojë në proces zgjedhor rolin dhe peshën që ka në skenën publike. Pa LDK-në nuk ka as zgjedhje e as zgjidhje. Pa LDK-në qeveritë ndërrohen shumë shpejt. LDK është partia e vetme e hapur dhe legale”, ka theksuar ai. /Telegrafi/