Një kamerë e vendosur brenda një veture ka filmuar momentin kur një foshnje që ishte e ulur në karrigen për fëmijë, “fluturon” nga vetura që ishte në lëvizje kurse e ëma që ishte prapa timonit as që e vëren dhe vazhdon rrugëtimin.
Dyvjeçares duket se e ëma kishte harruar t’ia vë rripin e sigurisë, dhe si pasojë e lëvizjeve të veturës hapet dera dhe foshnja së bashku me karrigen bien në rrugë në qytetin Mankato në Minnesota të SHBA-së, transmeton Telegrafi.
E gjithë ngjarja është filmuar nga kamera e vendosur brenda veturës së Chad Cheddar, ku shihet se si vajza e veshur me xhaketën ngjyrë rozë, bie nga vetura dhe rrokulliset me karrige.
Për fat të mirë kalimtarët e rastit i afrohen për ta ndihmuar dhe ndalur veturat tjera që vinin nga kahja e kundërt, me qëllim që të parandalojnë më të keqen. Mrekullisht vajza e vogël ka shpëtuar pa lëndime, pasi në momentin që ka rënë ishte karrigia që e kishte shpëtuar nga përplasjet në asfalt.
Sipas policisë foshnja ishte e vendosur mirë në karrige, por nuk e kishte pasur të vënë rripin e sigurisë. Megjithatë nuk dihet se si është hapur dera e veturës nga e cila “fluturoi” vogëlushja.
Ndërkaq e ëma që fillimisht nuk e kishte vërejtur se nuk e ka të bijën në veturë, është rikthyer në vendin e ngjarjes për ta kërkuar. /Telegrafi/
