Haradinaj: U kujdesëm për kryeqytetin më shumë se të tjerët

Nazmi Elezi

4 years ago

Kryetari i Aleancës për Ardhmërinë e Kosovës (AAK), Ramush Haradinaj sot është takuar më strukturat e AAK-së në Prishtinë.

Ai me këtë rast tha se Prishtina si kryeqytet ka përjetuar dorën e nivelit qendror vetëm kur AAK udhëheqi me qeverinë.

“Vetëm Aleanca i pagoi borxhin Prishtinës, duke e shtyrë para dhe miratuar ligjin, i cili u mohua nga të tjerët. Ne u kujdesëm për Prishtinën më shumë se të gjithë të tjerët, edhe pse asnjëherë nuk na u dha besimi për ta udhëhequr”, ka shkruar Haradinaj në Facebook.

Postimi i plotë:

“Nuk ishte e lehtë për ne si Aleancë të fitojmë besimin e banorëve të kryeqytetit. Megjithatë, vetëm Aleanca i pagoi borxhin Prishtinës, duke e shtyrë para dhe miratuar Ligjin, i cili u mohua nga të tjerët. Ne u kujdesëm për Prishtinën më shumë se të gjithë të tjerët, edhe pse asnjëherë nuk na u dha besimi për ta udhëhequr.

Njëjtë ka ndodhur edhe me Mitrovicën. Në momentin e parë që ishim në qeverisje të vendit, ne e finalizuam statusin e Trepçës. Por, as në Mitrovicë asnjëherë nuk morëm besimin për të udhëhequr.

Ky raport që Aleanca e ka me Prishtinën dhe Mitrovicën, tregon qartë orientimin tonë drejt interesit nacional, e jo interesave të ngushta të politikave ditore.

Sot në takim me strukturat e degës së Aleancës në Prishtinë, falenderova të gjithë kandidatët, e në veçanti veteranët e Aleancës, ata që i mbetën besnik gjatë tërë këtyre viteve vizionit dhe programit të saj.

Oferta e Aleancës është më e mira për zgjedhjet e 14 shkurtit. Unë me kënaqësi i prijë kësaj liste të intelektualëve të të gjitha moshave e profileve, si kandidat për President i cili bashkon, që garanton se si Kosovë po ecim në drejtimin e duhur, si President që i del përpara Serbisë dhe si President që di të punojë me aleatët tonë.

Uroj suksese për të gjithë kandidatët dhe ecim faqebardhë përpara”, ka shkruar lideri i AAK-së. /Telegrafi/