Lirimi i bizneseve nga detyrimet e shumta fiskale në importin e materialit riprodhues, pajisjeve dhe teknologjive për prodhuesit e vendit, e kanë bërë Kosovën ambient shumë të përshtatshëm biznesor.
Kështu ka deklaruar kryeministri Ramush Haradinaj pas një takimi me përgjegjësen e kompanisë “NEWKO Balkan”-Suharekë, Merve Yilmaz.
“Biseduam për zhvillimin e mëtejmë të industrisë së gomës, për evitimin e barrierave eventuale në tregun vendor, si dhe për përmirësimin e pozitës së prodhuesve nga Kosova në vendet anëtare të CEFTA-s”, ka shkruar Haradinaj në Facebook.
“Qeveria do të vazhdojë t’i mbështesë prodhuesit dhe të ndërmarrë masat e nevojshme që ata të jenë të barabartë në tregun rajonal dhe të Bashkimit Europian”, ka thënë ai.
Përfaqësuesit e kompanisë “NEWKO Balkan” falënderuan kryeministrin Haradinaj për pritjen, si dhe për gatishmërinë për zgjidhjen e problemeve me të cilat përballen bizneset dhe prodhuesit në Kosovë. /Telegrafi/