Lideri i Aleancës për Ardhmërinë e Kosovës, Ramush Haradinaj ka reaguar pas arrestimit të aktivistëve të kësaj partie, të cilët sot kanë vendosur një arkivol para Qeverisë së Kosovës, duke simbolizuar kështu varrosjen e premtimeve nga Qeveria Kurti.
Haradinaj theksoi se trajtimi policor i qytetarëve të ndershëm, vetëm pse ia kujtojnë kryeministrit Kurti shkeljen flagrante të parimeve të dikurshme, është kundër frymës së Kushtetutës së Kosovës, dhe ligjeve në fuqi.
“Dënoj ashpër aktin e arrestimit të aktivistëve të Aleancës së të Rinjve të AAK-së, Naim Ramizi, Musa Lekaj, dhe Edonis Kamberi, të cilët ishin duke realizuar një aksion simbolik kundër heqjes së taksës, para objektit të Qeverisë. I bëjmë thirrje pushtetit dhe institucioneve të rendit, që të lirojë menjëherë aktivistët e arrestuar, dhe të mos ua shkelë të drejtën e garantuar të kundërshtimit paqësor e politik qytetarëve të Republikës së Kosovës”, thuhet në reagimin e Haradinajt. /Telegrafi/