Në Kuvendin e Kosovës, ka nisur seanca e jashtëzakonshme për heqjen e taksës. Në emër të AAK-së si grup parlamentar i cili ka iniciuar këtë seancë, foli deputeti Daut Haradinaj i cili tha se taksa ndaj Serbisë nuk duhet të hiqet.
Haradinaj shtoi se vendosja e taksës ndaj Serbisë nuk ishte e rastësishme.
“Vendosja e taksës nuk ishte e rastësishme, ishte masë ndëshkimi ndaj Serbisë e cila nuk e kursente asnjë formë për ta penguar anëtarësimin e Kosovës në organizatat ndërkombëtare. Taksa ishte fillimisht goditje ekonomike ndaj Serbisë”, tha Haradinaj.
Deputeti i AAK-së, shtoi se taksa nuk ishte vendosur asnjëherë kundër aleatëve të Kosovës, shkruan Telegrafi.
“Taksa u vendos kundër Serbisë dhe asnjëherë të vetme nuk është vendosur ndaj aleatëve tanë që e ndihmuan shtetësinë e Kosovës. Presioni për heqjen e taksës edhe pse ishte i madh, nuk i lëkundi institucionet tona. Kosova nuk duhet as tash të dorëzohet ndaj Serbisë”, shtoi Haradinaj.
Haradinaj tha se e kujton kohën kur kryeministri aktual, Albin Kurti rrokullisi veturat e EULEX-it, protestat e përgjakshme e arrestimet e aktivistëve vetëm e vetëm për ta penguar agresionin e Serbisë dhe barkodin 860.
“Tashmë pe shohim se kryeministri është dorëzuar ende pa i ardhur presioni serioz. Kryeministri shkeli mbi prodhuesit vendor… Sot kemi 100 arsye të kundërshtojmë heqjen e taksës, e aq më shumë që Kosova nuk e ka garancinë e SHBA-ve që me heqjen e saj do ta sigurojë njohjen e Kosovës nga Serbia”, tha Haradinaj.
Ai ftoj deputetët që të jenë unik përball Serbisë.
“Ju ftoj të jemi unik përball Serbisë… dhe t’ia bëjmë të qartë të gjithëve që pavarësia e 17 shkurt dhe integriteti territorial është i pa negociueshëm”, tha Haradinaj.
Haradinaj në fund pyeti kryeministrin Kurti se përse i buzëqeshi Bërnabiqit duke i kërkuar që të mos e largoi taksën. /Telegrafi/