Kryeministri i vendit Ramush Haradinaj, sqaroi incidentin e së enjtes që ndodhi me kryesuesin e Kuvendit të Republikës së Kosovës, Xhavit Haliti në seancën e Kuvendit teksa po votohej mocioni që ligjet për transformimin e FSK-së të hyjnë të parat në rend dite.
Haradinaj në një konferencë për media ka thënë se u habit me heshtjen e kryesuesit kur votohej mocioni, pasi sipas tij përderisa në votim rezultonin diku 50 veta, në sallë reaguan se kishin votuar pro mocionit edhe diku 20 deputetët tjerë, raporton Telegrafi.
Ai u shpreh se nuk ka diçka tjetër në këtë rast.
“Kam shkuar në parlament për interpelancë e veçanërisht për pakon e tri ligjeve. Duke pa respektin e deputeteve për këto tri ligje, u habita që kryesuesi nuk e pa që 20 deputetë kishin votuar e ai si kishte pa. Ata ishin në këmbë dhe thoshin ‘kemi votu’. Rezultoi që ishin 50 e diçka vet që kishin votuar për, e ndërkohë në votimin e dytë mbi 80. Më bëri përshtypje. Nuk mendoj që ka aspekte tjera”, sqaroi situatën e sikletshme që kishte kryeministri i vendit, Ramush Haradinaj me kryesuesin e Kuvendit, Xhavit Haliti. /Telegrafi/
