Kryeministri i vendit, Ramush Haradinaj ka thënë sot se pas takimit me përfaqësuesit e partive politike kanë rënë dakord që të vazhdohet me tryeza tjera për të diskutuar për temat nacionale.
Ai në një prononcim për media tha se tashmë kanë përgatitur edhe një platformë për dialogun.
I pyetur për mundësinë e zgjedhjeve të parakohshme, Haradinaj tha ” S’po duket që don dikush zgjedhje të parakohshme”.
Ndryshe, tryeza e diskutimit në mes partive politike pozitë-opozitë, e cila është thirrur nga kryetari i Partisë Demokratike të Kosovës (PDK), Kadri Veseli ka për qëllim arritjen e konsensusit politik për agjendën shtetërore të Kosovës.
Në këtë tryezë, Veseli ka propozuar të diskutohet për çështjet më prioritare për shtetin, me theks të veçantë për: fazën përfundimtare të dialogut për normalizimin e marrëdhënieve Kosovë-Serbi, hartimin e Statutit për Asociacionin e Komunave me Shumicë Serbe, agjendën e integrimeve evropiane, formimin e Ushtrisë së Kosovës, reformën zgjedhore. /Telegrafi/