Lideri i Aleancës për Ardhmërinë e Kosovës, Ramush Haradinaj i cili u arrestua në Francë pas një flet-arresti të Serbisë ka kujtuar sakrificën e familjes Jashari.
Ai në rrjetin social “Facebook”, shkruan se nuk ka sakrificë më të madhe sesa sakrifica e familjes Jashari.
Lexoni të plotë postimin e Haradinajt në Facebook:
“Nuk ka ditë më të shënuar se sa dita e sotme! Nuk ka sakrificë më të madhe se sa sakrifica e Familjes Jashari! Të gjithë të gjallët janë të vegjël përpara heroizmit të luftëtarëve të lirisë, të prirë nga Adem Jashari, të cilët sot pushojnë në varrezat e Kompleksit Memorial në Prekaz.
Ne u jemi borxhli të rënëve të lirisë, pa të cilët Kosova e lirë as që do të mund të imagjinohej! Ndjenja qenka edhe më e fortë, kur ngjarjet e tilla i kujton larg atdheut.
Lavdi e përjetshme veprës heroike të tyre!”. /Telegrafi/