Rënia e Mujë Krasniqit është një ndër momentet më të dhimbshme dhe vepra e tij do të kujtohet dhe nderohet me pietet nga të gjithë ne.
Kështu tha kryeministri i Kosovës, Ramush Haradinaj, në një akademi përkujtimore organizuar nga Shoqata e Familjeve të Dëshmorëve të luftës së UÇK-së për nder të rënies heroike të komandantit të Brigadës 133 Mujë Krasniqi dhe 41 dëshmorëve të kombit, në kufirin shqiptaro-shqiptar, më 14 dhjetor 1998.
“Shembulli i luftëtarit të mirë shqiptar bashkohet te figura e Mujë Krasniqit, një djalë i pastër në shpirt, në bindje, një djalë i cili veç drejtësi ka nxjerrë nga vetja”, tha kryeministri Haradinaj, duke theksuar se bashkëluftëtarët e Mujës, familjet që sot i kujtojnë bijtë e vet, 41 të rënë në këtë ditë dhe 178 bashkëluftëtarët e Brigadës 113 “Mujë Krasniqi”, kanë qenë me fat që djemtë e tyre kanë luftuar krah dhe nën emrin e Mujë Krasniqit, luftëtarit shembull për të tjerët.
Më tej, kryeministri theksoi se flijimi i familjes Jashari, komandantit legjendar Adem Jashari, porosia që u dërgua te shqiptarët, nuk ishte porosi e njërit nga ne, por porosi e shpirtit të luftëtarëve, e të cilën Muja e përhapi në Dukagjin e çdokund.
“Ai edhe pse me shumë plagë dhe me shumë vështirësi në bërjen e luftës në të gjitha trevat, nuk përtoj ta mbajë të gjallë luftën, nuk përtoj që edhe i pashëruar nga plagët e luftës të kthehet në luftë”, tha kryeministri.
“Rënia e komandant Mujës është ndër momentet më të prekshme dhe të dhembshme të luftës, por edhe humbje e padrejtë që ka ndodhur në luftë. Megjithatë, kjo është edhe një dëshmi se sa e vështirë ishte rruga deri në liri”, tha ai.
Duke nderuar veprën e komandant Mujës dhe gjithë të rënëve për liri, kryeministri tha se shumë shpejt do të ndërtohet Memoriali, ashtu siç ju takon këtyre luftëtarëve.
Ndërsa kryetari i Shoqatës së familjareve të luftës Xhavit Jashari tha ka ende shumë dilema nëse është përmbushur amaneti i dëshmorëve.
“Në këtë përvjetor të rëndësishëm të dëshmorëve të rënë në Brigadën 113 bashkë më komandantin Mujë Krasniqi shtrohet një pyetje, se a po realizohet amaneti i dëshmorëve të kombit? Këto dilema janë të pranishme edhe sot qofte se ne shqiptarët nuk kemi pasur mundësi që të bëjmë realitet, nëse nuk kem mundur ta realizojmë bashkimin e kufirit shqiptar. UÇK përveç sakrificës që duhet bërë për liri, ata po ashtu rrinë mbrapa betimit të një ushtrie që duhet dhënë jetën për liri”, tha Jashari.
Të pranishmit i përshëndeti edhe babai i Mujë Krasniqit, Halil Krasniqi.
“Respekt për të gjithë ju që keni ardhur këtu në këtë akademi përkujtimore” tha ai./Telegrafi/