Kryetari i Aleancës për Ardhmërinë e Kosovës, Ramush Haradinaj, në 22-vjetorin e masakrës në Lybeniq të Pejës, ka bërë sot homazhe, me ç’rast tha se nderimi për të rënët është edhe thirrje për drejtësi.
Haradinaj tha se masakra në Lybeniq nga forcat serbe është një ndër më të mëdhatë në Kosovë, ku ende ka të pagjetur.
“Sot jemi në Lybeniq, në përvjetorin e njërës prej masakrave më të mëdha në Kosovë, sidomos të kësaj pjese të Kosovës. Ende ka të pagjetur, bashkëkombasit tanë, qytetarë e fëmijë janë masakruar në këtë vend. Nderimi për ta është thirrje për drejtësi por edhe thirrje për të ecë në rrugën e lirisë, na obligojnë varret e e gjitha ajo sakrificë që ka ndodhur këtu”, u shpreh Haradinaj.
Ndryshe, më 1 prill 1999, në Lybeniq të Pejës në orët e hershme të mëngjesit, formacionet ushtarake, policore, militare dhe paramilitare serbe kishin rrethuar në të gjitha anët këtë fshat i cili shtrihet rrëzë Alpeve Shqiptare dhe në mes të fshatit Raushiq dhe Strellc, ku vranë shumë persona./Telegrafi/