Kryetari i AAK-së, Ramush Haradinaj me rastin e shënimit të 26 vjetorit të Epopesë së Dukagjinit, u shpreh se “Gllogjani ndodhi për shkak të Prekazit”, duke iu referuar betejës 26 vjet më parë.
“Nga dita e betejës në Prekaz, u mobilizuam Dukagjini të gjithë, në një përgjigje me luftë, me zjarr, me sulme, pas asaj që ndodhi në Prekaz. Kuptohet, edhe frikën e kishim, për shkak se ishte në pyetje rrjedha e luftës, jo veç çka do të ndodhte, nëse do të sulmoheshim në, a do të vriteshim të gjithë ne, por çfarë do të ndodhte me luftën. Pra, keni parasysh, dy herë frikë. Një herë për jetën e secilit, e dyta për fatin e luftës sonë”, ka thënë Haradinaj.
Ai më tej ka shtuar se janë vra do djem të mirë që i kujtojmë sot, djem të zotë, por nuk u vra lufta atë ditë.
“Pra kjo është me rëndësi në fund të ditës. Këtu në këtë vend, në këtë truall kanë mbetur shqiptarët, e kanë ikur forcat e Millosheviqit. Kjo është e vërteta e kësaj dite. Krejt familja, krejt ata që mujtën me luftu atë ditë, kanë të drejtë me qenë krenar përjetësisht, sepse nga ajo ditë u çu një porosi që shqiptarët do të luftojnë, do ta fitojnë luftën, e kjo ndodhi këtu”, tha Haradinaj.
Haradinaj tha se në nisjen e bombardimeve “nuk ka pasur ditë më të gëzuar, ditë më të mirë e ditë më të lumtur sesa ajo ditë”.
Atë ditë, ai e përshkruan si ditën “që edhe njëherë na ka rilindë neve shqiptarëve”.
“Më 24 mars ’99, Millosheviqi e mori atë që i takonte, atë që ua kishte bërë shumë familjeve shqiptare: atë që e bëri në Qirez, Likoshan, atë që e bëri në Prekaz, në Gllogjan, në Meje”, tha Haradinaj, duke shtuar “rrnoftë Amerika, rrnoftë NATO”./Telegrafi/