Ish-kryeministri i Kosovës nga Colmari i Francës ku po mbahet me një fletëarrest të Serbisë, ka thënë se veprimet e liderëve të sotëm të shtetit fqinj janë të ngjashme me ato të Sllobodan Millosheviqit dikur.
Ai ka deklaruar se e ka habitur vendimi i gjykatës franceze për ta shtyrë vendimin, marrë parasysh se të gjitha procedurat ligjore lidhur me këtë rast janë përmbyllur.
“Edhe ashtu është humbur shumë kohë, për një lëndë për të cilën nuk ka pasur nevojë kaq shumë kohë. Është krejt lojë politike. Burimin kjo lojë e ka në Beograd”, ka thënë ai.
Haradinaj ka theksuar se nuk ka akuzë që e ndal atë t’i shërbejë Kosovës, duke shtuar se rasti i tij, pa marrë parasysh se si shihet tani, nesër do të jetë përkujtues për pafuqinë e Serbisë në raport me shqiptarët.
“Unë i shërbej vendit tim, popullit tim”, thotë ai. “I mbaj mend shefat e sotëm në Beograd, kur vinin t’i takonin shefat e tyre në Hagë. Janë vartës të tyre. Po dëshirojnë t’i vazhdojnë praktikat e dikurshme për të ndërhyrë në Kosovë. Unë e kam thënë dhe po e përsëris që përgjigjen që ua kemi dhënë më 1998-99 e do t’ua japim gjithmonë nëse duan t’i fusin duart në Kosovë”.
Haradinaj shprehet se presidentit të Serbisë, Tomislav Nikolliq, do t’i jepet përgjigja e njëjtë si më 1998-99.
“Nikolliqi tha se do të vijë me djemtë e tij të luftojë në Kosovë. Le të vijë e ta shohë si do t’i dalë. Do ta bëjmë më zi se më parë. Edhe kjo që po e bëjnë nuk do të kalojë pa sanksione. Këto goditje ndaj meje kanë vetëdijesuar njerëz. Unë jam i bindur që shumë më pak produkte serbe shiten në Kosovë dhe shumë më shumë shqiptarë janë të bindur për t’i qëndruar të drejtës së vet”, thotë ai, duke shtuar se Prishtina zyrtare është treguar e dobët në raport me Beogradin, meqë duhet reciprocitet në shpalljen persona non grata të zyrtarëve të shtetit serb.
Haradinaj thotë se fëmijët nuk i kam parë tash e dy muaj.
“Çka t’i bësh! Janë mësuar ata me situata të tilla të vështira. Por, po e them edhe njëherë, që nëse Jasharajt janë ‘shkrirë’ deri në fëmijë, kjo është pak. Do të jem pa kompromis në temat e interesit nacional”, ka thënë ai. /klankosova.tv/