Kryetari i Aleancës për Ardhmërinë e Kosovës (AAK), Ramush Haradinaj, ka nisur ditën me një aktivitet të veçantë në natyrë.
Ai ka ngjitur Majën e Gjeravicës, duke ndarë këtë përvojë me ndjekësit e tij në rrjetet sociale.
Përmes një videoje të publikuar në Facebook, Haradinaj tregoi momentin e arritjes në majën më të lartë të Kosovës, duke u shprehur i lumtur për këtë sukses.
“16 shkurt 2025, e kemi ngjitë Majën e Gjeravicës”, tha Haradinaj në video, ndërsa në sfond shfaqeshin pamje të mahnitshme të bjeshkëve të Rugovës të mbuluara me borë.
Ngjitja e Gjeravicës, e cila ka një lartësi prej 2,656 metrash mbi nivelin e detit, është një sfidë e njohur për alpinistët dhe adhuruesit e natyrës në Kosovë.
Ajo konsiderohet si një nga atraksionet më të bukura natyrore të vendit dhe tërheq vizitorë të shumtë gjatë gjithë vitit, veçanërisht në muajt e verës dhe dimrit.
Ky nuk është hera e parë që Haradinaj angazhohet në aktivitete të tilla fizike.
Haradinaj njihet për dashurinë e tij për sportin dhe natyrën, si dhe për pjesëmarrjen e tij të shpeshtë në sfida të ndryshme malore.
Ngjitja e Majës së Gjeravicës vjen vetëm një ditë para shënimit të 17 Shkurtit, Ditës së Pavarësisë së Kosovës, dhe mund të shihet si një simbolikë për vendosmërinë dhe sfidat që vendi ka kaluar në rrugëtimin e tij./Telegrafi/
