Lideri i Aleancës për Ardhmërinë e Kosovës (AAK), Ramush Haradinaj ka kërkuar nga Kuvendi i Kosovës mbajtjen e një seance për interpelancë me kryeministrin e vendit, Albin Kurti, duke thënë se situata politike është ndër më të rëndat në këto 22 vjet.
Haradinaj në një konferencë tha se Serbia me aleatët e saj ka krijuar një skenar të destabilizimi të situatës në Kosovë.
“Kam kërkuar me urgjencë interpelancë me kryeministrin e Kosovës, Albin Kurti për situatën e krijuar në vend. Situata politike është ndër më të rëndat në këto 22 vjet. Serbia me aleatët e saj ka krijuar një skenar të destabilizimi të situatës në Kosovë, duke urdhëruar përfaqësuesit serbë në institucionet shtetërore e publike dhe të sigurisë që t’i braktisin ato. Për fat të keq edhe veprimet e deritanishme të institucioneve të Kosovës, nuk kanë qenë në përputhje me situatën e krijuar”, tha ai.
Haradinaj më tej shtoi se kryeministri i vendit në vend që të përfillë kërkesën e SHBA-së për të shtyrë zbatimin e marrëveshjes për targat, ka zgjedhur skenarin më të keq, zbatimin në faza të kësaj marrëveshje, me çka i ka dhënë hapësirë Serbisë, edhe ta luajë rolin e viktimës, edhe të ndërmarrë veprime anti-Kosovë.
“Fatkeqësisht as presidentja e as Kuvendi i Kosovës nuk kanë vepruar në përputhje me seriozitetin e situatës, duke vepruar sikur në vend në këto dy javë nuk ka ndodhur asgjë e jashtëzakonshme”, u shpreh Haradinaj.
Ai po ashtu ka paraqitur një rezolutë me disa pika, duke i kërkuar Kuvendit të Kosovës që ta votojë atë.
“Duke pasur parasysh këtë situatë, sa të rëndë po aq edhe të rrezikshme, i propozoj Kuvendit ta votojë rezolutën: Qeveria e Republikës së Kosovës të marrë vendim menjëherë për shtyrje të vendimit për targa deri në marrëveshje finale. 2-Institucionet e Kosovës: Presidenca, Kuvendi, Qeveria e Kosovës, institucionet në të gjitha nivelet, të fillojnë dialogun intensiv me serbët e Kosovës për t’u kthyer në institucionet e Kosovës dhe për të kthyer besimin e ndërsjellë. 3- Qeveria të nisë komunikimin intensiv me faktorët më relevantë në vend, duke përfshirë edhe opozitën, jo vetëm si reflektim i gjendjes së krijuar por edhe si nevojë e gjetjes së rrugëdaljes nga situata e krijuar. 4- Të kërkohet një Samit në SHBA (takim disaditor), deri në përmbylljes e marrëveshjes finale për njohje Kosovë-Serbi”, ka thënë Haradinaj. /Telegrafi/
