Shefi i Grupit Parlamentar të AAK-së, Daut Haradinaj ka thënë se AAK do ta përkrahë mocionin e mosbesimit ndaj Qeverisë.
Ai tha se qysh në fillim partia e tij kishte konsideruar se qeveria Kurti nuk do ta kishte jetën e gjatë.
“Kjo është një situatë më së paku e dëshiruar. Ne qysh në fillim kemi konsideruar se kjo qeveri nuk do ta ketë jetën e gjatë. Më vjen mirë që deputetët do ja marrin mandatin kësaj qeverie. Ne i kemi dhënë besimin këtij mocioni për disa arsye: e para ka qenë diskriminimi buxhetor, heqja e taksës pa asnjë profit, mos-negocimi i saj me SHBA-të mirëpo edhe me partnerët e koalicionit, por njëanshëm e largoi taksën dhe kjo natyrisht që qeverinë e kaluar e ka çu në shtëpi”, tha Haradinaj.
Sipas Haradinajt është lajm i mirë që qeveria po largohet bashkë me ministrin Veliu.
“Shkarkimi i Veliut, i cili shkarkohet për një prononcim medial, na jep me kuptu që kemi të bëjmë me një vetërrëzim të planifikum të kësaj Qeverie. Është lajm i mirë që bashkë me atë ministër, po shkon edhe kjo Qeveri”, tha Haradinaj.
Ai porositi qytetarët që të mos shqetësohen sepse institucionet përkatëse do ta kryejnë punën e vet.
“Kosova nuk do të mbetet pa qeveri, kjo qeveri do ta kryejë detyrën e vet deri në ardhjen e qeverisë së re”, tha Haradinaj. /Telegrafi/
