Hap fals nga Real Madridi në garë për titull, ndalet nga Getafe

Real Madridi ka bërë një hap fals në garë për titull, pasi është ndalur nga Getafe në kuadër të javës së 33-të në La Liga, derisa ndeshja përfundoi 0-0.

Vendasit e filluan më mirë takimin, duke rrezikuar qysh në minutën e gjashtë me anë të Jaime Matas, por goditja e tij përfundoi mbi portë.

Katër minuta më vonë, Getafe sërish rrezikoi portën e Los Blancos, tani me dyshen Marc Cucrella e Mauro Arambarri, por nuk e finalizuan.

Real Madridi në minutën e 28-të rrezikoi me anë të Mariano Diaz që kaloi edhe portierin, por u bllokua nga mbrojtësi kundërshtar.

Edhe 45 minutat e dytë filluan më mirë për Getafen, me Enes Unal që dështoi të shënonte nga afërsia.

Vendasit duket se nuk ishin të frikësuar nga madrilenët dhe sulmonin në vazhdimësi, mirëpo u mungoi konkretizimi në dhjetëra raste që kishin.

Ishte minuta e 80-të kur Angel u rrëzua në zonë, duke kërkuar më pas penallti, por gjyqtari bëri me shenjë se loja duhej të vazhdonte.

Pas javës së 33-të, Real Madridi është në vendin e dytë me 67 pikë, tre më pak se Atletico Madridi, derisa Barcelona ka një ndeshje më pak dhe ka 65 sosh, duke patur shansin që të kalojnë në pozitën e dytë. /Telegrafi/