Marek Hamsik festoi golin e tij të 100-të në fanellën e Napoli në fitoren 2-0 në shtëpi ndaj Chievos.
Mesfushori sllovak ka shënuar golin e dytë në fitoren e Napolit ndaj Chievos në ndeshjen e vlefshme për xhiron e gjashtë të Series A, gol ky që ishte i 100-ti i tij me fanellën e napolitanëve, por edhe pse bëhet pjesë e historisë, Hamsik thotë që më me rëndësi janë rezultatet e skuadrës.
“Ajo që doja të bëja ishte të fitojmë ndeshjen dhe e kemi arritur atë. Ndoshta ne duhet të kishim shënuar disa gola më shumë, por pas shumë ndeshjeve me radhë ky ishte një rezultat i mirë”, ka thënë Hamsik për Sky Sport Italia, transmeton Telegrafi.
“Unë jam i kënaqur me këtë pikë referimi, veçanërisht për një mesfushor, por ajo që me të vërtetë ka rëndësi është kur ekipi merr rezultate. Tani ne duhet të fokusohemi në Ligën e Kampionëve”, përfundoi kapiteni i Napolit.
Me këtë gol të shënuar, Hamsik tani radhitet i pesti në renditjen e golashënuesve, teksa në vend të parë gjendet legjenda Diego Armando Maradona me 115 gola. /Telegrafi/