Zëdhënësja e LDK-së, Sibel Halimi ka reaguar lidhur me vendimin e MINT për pezullimin e certifikatës së biznesit të televizionit Klan Kosova.
Halimi është shprehur se rasti i ndërhyrjes qeveritare në pavarësinë editoriale të Klan Kosovës, është arbitrar dhe meriton reagim gjithëshoqëror.
“Rasti i ndërhyrjes qeveritare në pavarësinë editoriale të Klan Kosovës, kinse për parregullsi në regjistrimin e biznesit është arbitrar dhe meriton reagim gjithëshoqëror!
Kosova meriton qeverisje të mirë, jo regjim! Për pezullimin e certifikatës së biznesit të Klan Kosova, ka reaguar edhe Sekretari Gjeneral i Federatës Evropiane të Gazetarëve, Ricardo Gutiérrez, i cili e ka cilësuar si një ditë zie për Kosovën, aktivizimin e shtetit në censurë ndaj Klan Kosovës”, ka shkruar Halimi.
Postimi i plotë:
Shqetësuese paraqitja arrogante e kryeministrit Albin Kurti në konferencën për medie. Asnjë strategji konkrete për kthimin e policëve të arrestuar nga Serbia, në shtëpitë e tyre.
Akuza e retorika boshe.
Koordinimi me aleatët e Kosovës është domosdoshmëri emergjente e jo leksione etike ndaj tyre.
Megjithëse dëmi i shkaktuar shtetit tonë, në raport me partnerët është jashtëzakonisht i madh.
Mllefi ndaj gazetarëve është i patolerueshëm, të cilët rrezikuan jetën e tyre për të raportuar drejt për gjendjen e krijuar në veri. Kjo qeveri çdo ditë është duke e rrezikuar shtetësinë e jetën e qytetarëve. Ndërsa, gabimet në qeverisje mësynë t’i kompensojë me frikësimin e mediave dhe izolimin e vendit.
Rasti i ndërhyrjes qeveritare në pavarësinë editoriale të Klan Kosovës, kinse për parregullsi në regjistrimin e biznesit është arbitrar dhe meriton reagim gjithëshoqëror!
Kosova meriton qeverisje të mirë, jo regjim!
Për pezullimin e certifikatës së biznesit të Klan Kosova, ka reaguar edhe Sekretari Gjeneral i Federatës Evropiane të Gazetarëve, Ricardo Gutiérrez, i cili e ka cilësuar si një ditë zie për Kosovën, aktivizimin e shtetit në censurë ndaj Klan Kosovës. /Telegrafi/
