Kryeshefi ekzekutiv i KQZ-së, Enis Halimi në një intervistë për Telegrafin me gazetarin Muhamet Hajrullahu, ka treguar shkaqet e vonesës së publikimit të rezultateve në faqen e KQZ-së, për zgjedhjet e 22 tetorit.
Halimi ka thënë se kjo ka ndodhur për shkak të problemeve teknike që ka pasur kompania e kontraktuar në serverin kryesor të faqes së KQZ-së.
“Të gjitha rezultatet i kemi marrë me kohë nga qendrat e votimit, por nuk kemi mundur t’i publikojmë për shkak të problemeve teknike nga kompania që kemi kontraktuar”, ka thënë Halimi.
Ai tutje ka treguar se kompania e cila ka pasur për obligim plasimin e të rezultateve në faqen e KQZ-së, vjen nga Maqedonia.
Halimi ka thënë se ndaj të njëjtës kompani do të merren masa konfrom kushteve të kontratës.
“Jemi në proces, dhe do të ketë penalizimet e veta për shkak të çalimit të punës konfrom kushteve të kontratës”, u shpreh Halimi.
Ai shtoi se e njëjta kompani ka publikuar rezultatet e zgjedhjeve edhe në vitin 2013 dhe 2014.
Sipas tij, gjatë zgjedhjeve parlamentare në qershor të 2017-ës, kishte disa sulme kibernetike të cilat i kanë denoncuar tek organet kompetente. /Telegrafi/
