Mbrojtësi i Paris Saint-Germain, Achraf Hakimi, ka treguar pse nuk u bashkua me Chelsean kur u largua nga Interi gjatë verës, pasi kishte dy oferta në tavolinë.
Marokeni iu bashkua Interit para sezonit 2020-21, duke u larguar nga klubi pas vetëm një sezoni në “San Siro”.
Mbrojtësi kishte ndikim te Nerazzurrët, por u largua shkaku i vështirësive financiare pas pandemisë COVID-19 dhe ishte emri i parë i madh që u largua nga klubi këtë verë.
Romelu Lukaku më vonë u bashkua me Chelsean, ndërsa Hakimi e pranoi se kishte ofertë edhe nga gjigantët anglezë, por vendosi për një lëvizjeje në Francë.
Hakimi u bashkua me PSG-në në Ligue 1, ku iu bashkuan pastaj edhe emra si Gigio Donnarumma, Sergio Ramos dhe Lionel Messi.
“Unë kisha dy oferta. Një nga Chelsea dhe një nga Paris Saint-Germain. Por ndjeva se duhej të vija në Paris, se do të isha i lumtur”.
“PSG është një klub i madh, e vlerësoj vërtet mbështetjen që tifozët më dhanë menjëherë. Isha me fat sepse shumë kampionë të tjerë u bashkuan me mua”.
“Ndihem mirë në PSG, ne kemi një ekip ëndrrash dhe jam i lumtur që jam pjesë e tij”, ka thënë Hakimi për L’Equipe.
Hakimi kontribuoi me shtatë gola dhe 11 asistime gjatë vitit të tij në Inter. /Telegrafi/