Kompania amerikane e teknologjisë IBM ka tërhequr vëmendjen ndaj hakerave që synojnë kompanitë thelbësore për shpërndarjen e vaksinave COVID-19, e cila është një shenjë që spiunët digjitalë po i kushtojnë vëmendje punës logjistike të vaksinimit të popullsisë së botës kundër coronavirusit.
Kompania IT-së njoftoi sot në blogun e saj se ka zbuluar një “fushatë globale” të përqendruar në organizata të lidhura me “zinxhirin e ftohtë” të vaksinës COVID-19, një proces i nevojshëm për të mbajtur dozat e vaksinave në temperatura jashtëzakonisht të ftohta ndërsa ata udhëtojnë nga prodhuesit në duart e njerëzve, raporton Reuters.
Njësia e sigurisë kibernetike e IBM tha se kishte zbuluar një grup të përparuar hakerash që punonin për të mbledhur informacione mbi aspekte të ndryshme të “zinxhirit të ftohtë” duke përdorur postat elektronike të dërguara në emër të drejtuesve në Hayer Biomedical, një furnizues kinez që transporton vaksinën dhe ruan mostrat biologjike, transmeton Telegrafi.
Hakerat bënë një përpjekje të jashtëzakonshme, tha analistja e IBM, Claire Zaboeva, e cila ndihmoi në hartimin e raportit. Hakerat hulumtuan markën e saktë, modelin dhe çmimet e frigoriferëve të ndryshëm, shpjegoi ajo.
“Kushdo që qëndron prapa kësaj ishte nga afër i vetëdijshëm se cilat produkte u përfshinë në zinxhirin e furnizimit për shpërndarjen e vaksinës për pandeminë globale,” tha analistja./Telegrafi/