Ministrja e Ekonomisë, Rozeta Hajdari ka bërë të ditur se përmes një urdhërese sot kanë vendosur të kufizojnë ngritjen e çmimeve pas gjendjes me pandeminë coronavirus në pothuajse të gjithë botën.
Në mbledhjen e jashtëzakonshme të Qeverisë së Kosovës, ajo tha se këtë urdhëresë e ka marrë në bazë të ligjeve, teksa iu bëri thirrje inspektorëve të tregut për të dalë në terren dhe të marrin masat përkatëse.
Ministri i Financave, Besnik Bislimi tha se dikasteri që ai udhëheq, po ashtu ka marrë vendim për të parandaluar manipulimin me çmime të artikujve ushqimorë. Ai tha se nuk ka kufizime të mallrave nga ana e Kosovës dhe Shqipërisë.
Ndërsa, ministrja e Arsimit, Hykmete Bajrami tha se vendimi i Qeverisë për ndërprerje të mësimit nuk po respektohet nga shkollat e komunitetit serb. Për këtë ai theksoi se duhet të merren masat sipas ligjeve në fuqi.
Krah as kësaj, ministrja e Drejtësisë, Albulena Haxhiu ftoi organet e drejtësisë që të sigurohet se po zbatohen në tërësi vendimet e Qeverisë për parandalimin e coronavirusit.
Por ministri i Punëve të Brendshme dhe Administratës Publike, Agim Veliu tha se pas një takimi që ka pasur sot me përfaqësues serbë, nuk do të ketë nevojë intervenimi shtetëror për ndalimin e mësimit në shkollat e komunitetit serb.
Në vazhdën e këtyre diskutimeve, ministri i Infrastrukturës dhe Ambientit, Lumir Abdixhiku tha se ka anuluar fluturimet që vijnë nga disa shtete të Evropës për shkak të pandemisë me coronavirus.