Komisioneri Evropian për Zgjerim dhe Politikë Fqinjësore, Johannes Hahn, ka thënë se krijimi i institucioneve të Kosovës është një hap i rëndësishëm.
Duke theksuar se BE-ja është e informuar në lidhje me formimin e institucioneve të Kosovës, Hahn ka thënë se Qeveria e Kosovës ka një përgjegjësi ndaj qytetarëve të saj për të bërë progres në rrugën drejt BE-së, duke zbatuar reformat në fushën e sundimit të ligjit, ekonomi, liberalizimin e vizave dhe dialogun me Beogradin, transmeton lajmi.net.
Po ashtu, Brukseli pret që qeveria e re e Kosovës të luajë një rol aktiv dhe konstruktiv në rajon për të bashkëpunuar me Beogradin.
“Formimi i institucioneve në Kosovë pas disa javësh pasigurie politike, është një hap shumë i rëndësishëm. Kosova përballet me shumë sfida të vështira duke përfshirë korrupsionin, sundimin e dobët të ligjit, papunësinë e lartë dhe nivelet e ulëta të sistemit arsimor”, thuhet në deklaratën e përbashkët të lëshuar në EEAS.