Sulmuesi i Manchester City, Erling Haaland nuk është i sigurt nëse mbrojtësit e Ligës Premier janë të frikësuar prej tij, por ai nuk po e përjashton as këtë, teksa zbuloi gjithashtu se sa afër ishte për të përfaqësuar Anglinë në skenën ndërkombëtare.
Haaland ka shijuar një fillim rekord të jetës në ligën angleze pas transferimit të tij gjatë verës nga Borussia Dortmund, dhe është shumë përpara në garën për “Këpucën e Artë” për sezonin 2022-2023.
Mbrojtjet lart e poshtë vendit janë bërë të vuajnë nga gjiganti norvegjez, i cili është dukur pothuajse i pandalshëm, duke çuar në pyetjet se kur, jo nëse do të thyejë rekordin e të gjitha kohërave të golave në Liga Premier.
Por, a janë mbrojtësit tashmë të frikësuar nga Haaland?
“Nuk e di. Ju duhet t’i pyesni ata. Ata ndoshta do të thonë jo, por ndoshta janë!”, ka thënë fillimisht Haaland për GOAL, kur iu bë pyetja gjatë paraqitjes së tij në Box to Box.
Haaland është i ri për shumicën e mbrojtësve anglezë këtë sezon, megjithëse kjo mund të kishte qenë shumë ndryshe nëse ai do të kishte kaluar disa vite të tjera të fëmijërisë së tij në Angli.
I lindur në Leeds ndërsa babai i tij, Alfie, luante në Ligën Premier, Haaland kishte të drejtë të përfaqësonte Tre Luanët, por mori vendimin të ndiqte gjurmët e babait të tij dhe të luante për Norvegjinë, ku kaloi pjesën më të madhe të rritjes së tij.
“Kam jetuar këtu për tre vjet e gjysmë, katër vjet. Por, unë kam jetuar në Norvegji për një kohë kaq të gjatë, kështu që ishte e natyrshme që të zgjidhja Norvegjinë”.
“Asnjëherë nuk e dini se si mund të kishte qenë nëse babai im do të kishte luajtur më gjatë në Angli, ndoshta unë do të isha anglez! Por unë jam norvegjez dhe jam krenar për këtë”, përfundoi sulmuesi i Cityt. /Telegrafi/