Ricardo Rossello ka bërë të ditur, se është dorëhequr nga posti i guvernatorit të Porto Rikos, pas 12 ditë demonstratash masive kundër udhëheqjes së tij.
Derisa turmat kishin mbushur rrugët e kryeqytetit, në Facebook u shpërnda regjistrimi i guvernatorit 40-vjeçar që tregonte se e ka lënë postin, ku shërbeu me shumë krenari, transmeton Telegrafi.
“Vështirë se mund të kontribuoj më në këtë post, sepse ka shumë pakënaqësi ndaj kësaj qeverie, duke bërë që shteti të mos ketë sukses. Me të dëgjuar kërkesat, u konsultova me familjarët dhe bashkëpunëtorët, me vështirësi po e lë këtë pozitë, ku shërbeva me shumë nder dhe krenari” ka thënë Rossello.
Pakënaqësitë rreth tij, erdhën pas rrjedhjes së bisedave që kishte bërë guvernatori me bashkëpunëtorë, ndërsa dëgjohej duke përqeshur femrat si dhe viktimat e një uragani.
Me të mësuar lajmin e dorëheqjes, demonstrata është kthyer në festë që ka zgjatur deri në orët e vona të natës. /Telegrafi/
