Pep Guardiola ka thënë se nëse Manchester City nuk e fiton Ligën e Kampionëve në sezon, nuk do të ishte një katastrofë.
Trajneri spanjoll ka zbuluar se që kur erdhi te Citizens atij nuk i është thënë se qëllimi kryesor është që ta fitojë garën më të madhe për klube në Evropë, por ta ndërtojë një skuadër të suksesshme.
“U kujtoj se pyetja e parë kur erdha te Manchester City ishte nëse do ta fitoja Ligën e Kampionëve dhe tani bëhet e njëjta pyetje”, ka thënë Guardiola.
“E kam thënë se kam biseduar me pronarin e klubit dhe ai nuk më ka thënë se isha këtu për ta fituar Ligën e Kampionëve, por ta shihnim si projekt brenda ndërtimit të kontratës”.
“Njerëzit duan ta fitojnë trofeun, tifozët duan ta fitojnë atë po ashtu. Pa mbështetjen e tyre ne nuk do të mund të arrinim këtu”.
“Ne do të tentojmë ta fitojë në këtë vit. Do të isha i lumtur nëse kjo gjë ndodhë, po nëse jo nuk do të ishte një katastrofë, do të tentojmë sërish vitin tjetër”, ka shtuar më tej spanjolli.
Guardiola ka arritur që të ndërtojë një skuadër të fuqishme te City, duke e fituar dy herë radhazi titullin e Ligës Premier, ndërsa tani i mbetet Liga e Kampionëve. /Telegrafi/