Pep Guardiola ka dhënë një tjetër të dhënë të madhe për të ardhmen e tij te klubi i madh i Ligës Premier, Manchester City.
Trajneri spanjoll është në krye të Cityt që nga viti 2016, dhe sezonin e kaluar ai e udhëhoqi klubin drejt një triumfi të trefishtë historik.
City i Guardiolës konsiderohen ndër skuadrat më të mirë në histori, megjithëse hija e hedhur mbi Etihad Stadium nga akuzat financiare me të cilat përballet klubi e ka lënë në dyshim të ardhmen e tij.
“Qytetarët” akuzohen për 115 shkelje të rregullave financiare të Ligës Premier, duke përfshirë akuzat se kanë fryrë marrëveshjet e sponsorizimit dhe nuk kanë bashkëpunuar me hetimet. City i ka mohuar këto akuza.
Kontrata aktuale e Guardiolës është caktuar të skadojë në vitin 2025, por ai tani ka lënë të kuptohet se mund të zgjasë më tej qëndrimin e tij me kampionët në fuqi të Ligës Premier.
“Ende ndihem mirë në City dhe një ditë do të përfundojë, por nuk po mendoj për këtë tani”, ka thënë fillimisht Guardiola para ndeshjes ndaj Burnley.
“Unë kam thënë shumë herë, kam gjithçka që një trajner mund të ëndërrojë. Unë kam gjithçka. Hierarkia më mbështet mua, lojtarët më mbështesin, ne kemi një mjedis të mirë”, përfundoi ai.
Mediumi Athletic kohëve të fundit pretendoi se nëse City shpallet fajtor dhe dënohet me rënie nga kategoria, disa figura në klub besojnë se Guardiola do të nënshkruante një kontratë të re pa kundërshtim.
Marrëveshja e mëparshme e Guardiolës ishte caktuar të skadonte verën e kaluar, por në nëntor 2022 ai u dha fund spekulimeve duke rinovuar edhe për dy vite.
Lajmet e fundit se menaxherët Jurgen Klopp dhe Xavi Hernandez do të largohen nga pozicionet e tyre në Liverpool dhe Barcelona respektivisht në fund të sezonit, kanë sjellë tendosjen dhe presionin që përjetojnë trajnerët në fokus të ri.
Të dy e panë rraskapitjen si arsye për t’u larguar, por në nëntor Guardiola këmbënguli se ai ka ende shumë energji, pavarësisht se ka menaxhuar Cityn për më shumë se shtatë vjet. /Telegrafi/