Zv. kryeministri i parë dhe ministër për sistem politik dhe marrëdhënie ndërmjet bashkësive, Artan Grubi sot realizoi takim pune me homologen e tij nga Republika e Kosovës, zv. kryeministren Albulena Balaj Halimaj.
Zv. kryeministri i parë Grubi gjatë konferencës për shtyp tha se me kolegen e tij Balaj-Halimaj kanë diskutuar për mbledhjen e përbashkët ndërqeveritare midis dy vendeve tona që do të mbahet me 25 janar të vitit të ardhshëm.
“Diskutuam për propozim marrëveshjet të cilat i kanë propozuar ministritë e dy qeverive tona dhe janë të shumta në numër dhe të cilat gjithsesi se duhet të presin dhe dakordim final midis grupeve teknike dhe atyre politike që në mënyrë solemne me 25 janar të vitit të ardhshëm të nënshkruhen nga ministrat dhe të solemnizohen në mbledhjen e përbashkët të qeverive tona që do të mbahet në Shkup”, deklaroi Grubi.
Ndërkohë zv. kryeministrja e Qeverisë së Republikës së Kosovës, Albulena Balaj Halimaj gjatë konferencës së përbashkët për shtyp, i tha Grubit se ka kënaqësinë të sheh një qeveri e cila ka vullnetin e mirë për të bashkëpunuar me Republikën e Kosovës, duke theksuar se edhe pala kosovare është tejet e interesuar që të nënshkruaj marrëveshje të cilat janë në interes të vendeve tona por dhe të qytetarëve tanë.
“Deri më tani janë rreth 20 marrëveshje të cilat pritet të nënshkruhen e për të cilat do të diskutojë edhe niveli i ekspertëve, niveli teknik pastaj edhe vullneti politik i joni. Ka shumë marrëveshje që janë nënshkruar më herët me Republikën e Maqedonisë së Veriut e të cilat kanë qenë shumë të suksesshme. Ajo që vlen të theksohet, në këtë mbledhje të dy qeverive pikë e rëndësishme është nënshkrimi i marrëveshjes për pikat kufitare që do të bëhen One Stop Shop”, është shprehur Balaj Halimaj./Telegrafi/