Në një ngjarje të pazakontë në Tonteg të Mbretërisë së Bashkuar, një grua 72 vjeçare u bë qendra e vëmendjes e një ngjarjeje të paparashikuar jashtë dyqanit Best One.
Ndërsa priste hapjen e dyqanit, Anne Hughes e gjeti veten të “ngritur në ajër”.
Xhaketa e saj kishte ngecur në derën elektrike të dyqanit. Teksa dera ngrihej lart, ngrihej edhe zonja.
Kamerat kapën pamjet e incidentit që e bënë atë viral në rrjete sociale, përcjell Telegrafi.
E moshuara përfundoi e varur me kokë poshtë duke u mbajtur fort për karrocën e saj të blerjeve.
Për disa sekonda Hughes mbeti në atë pozicion të pasigurt, derisa ajo u shpëtua nga një punonjës i dyqanit i cili e uli zonjën poshtë duke u siguruar që ajo të mos pësonte asnjë lëndim.
Pavarësisht befasisë që u ngrit papritur dhe qëndroi pezull për një kohë, Anne e mori situatën me humor.
Ajo me shaka tha se tani duhet “ta menaxhojë famën”, pasi pamjet kanë qarkulluar shumë në internet. /Telegrafi/