Një grua që u mbajt padrejtësisht në paraburgim ka fituar gjyqin me shtetin shqiptar në Strasburg.
Tashmë shteti shqiptar duhet t’i paguajë kësaj shtetaseje dëmshpërblim.
Bëhet fjalë për çështjen “Hysa kundër Shqipërisë”, ku një shtetase shqiptare, Afërdita Hysa, e cila ishte mbajtur në paraburgim me akuzën e shpërdorimit të detyrës, pretendonte pranë Gjykatës Europiane të të Drejtave të Njeriut, se kishin munguar arsyet e duhura dhe të mjaftueshme nga gjykatat vendase për të justifikuar paraburgimin e saj.
Ajo e kishte apeluar më herët masën ndaj saj në gjykatat vendase, me pretendimin se paraburgimi nuk ishte masë proporcionale dhe e justifikuar.
Hysa e bazonte mungesën e justifikimit për masën e paraburgimit në faktin se ajo ishte vetë-dorëzuar pranë policisë dhe rreziku i arratisjes së saj nuk ekzistonte, pasi ishte e martuar me një oficer policie dhe nënë e dy fëmijëve të vegjël.
Gjykata e Strasburgut i jep të drejtë ankueses dhe del në përfundimin se është shkelur neni 5 pika 3 i konventës europiane për të drejtat e njeriut (nen që lidhet me lirinë dhe sigurinë), pasi gjykatat vendase nuk kanë dhënë arsyet e duhura dhe të mjaftueshme për periudhën e parë të burgimit të kërkueses.
Vetëm rëndësia e veprës penale sipas GJEDNJ, nuk mjafton për të sjellë paraburgimin. GJEDNJ argumenton se burgimi kërkon dyshim të arsyeshëm dhe se rreziku i mundshëm i arratisjes nuk ishte adresuar siç duhej nga gjykatat shqiptare.
Ky vendim i Gjykatës Europiane për të Drejtat e Njeriut tregon edhe njëherë se si gjykata vendase kanë tejkaluar kriteret ligjore dhe kanë shkelur Konventën Europiane për të Drejtat e Njeriut, me disa vendime të tyre për masat e paraburgimit, raporton euronewsal.