Familja e presidentit Thaçi prej sot do ta ketë edhe një pagë më shumë në buxhetin familjar, pasi që Zonja e Parë, Lumnije Thaçi ka filluar punën si profesoreshë në Universitetin e Mitrovicës ‘Isa Boletini’.
Burime të sigurta të Veriu.info bëjnë të ditur se ajo nga sot ka nisur punën në Fakultetin e Inxhinierisë Mekanike dhe Kompjuterike në Universitetin e Mitrovicës, ku do të ligjërojë lëndët Makro-Ekonomi dhe Biznes Ndërkombëtar.
Në web-faqen e Universitetit të Mitrovicës shkruan këto lëndë që do t’i ligjërojë tash e tutje Zonja e Parë e Kosovës, sipas konkursit që ishte shpallur me 8 korrik të vitit 2016 (http://umib.net/wp-content/uploads/2016/07/Konkursi-per-personel-akademik.pdf), ndërsa rezultatet zyrtarisht nuk kanë dalë asnjëherë (https://umib.net/shpallje/konkurse/).
Pas disa raportimeve në redaksi, Veriu.info kishte mësuar se Lumnije Thaçit po i përgatitet një vend pune në UMIB, ku për të sqaruar këtë çështje me datë 15 shkurt kemi pyetur zyrën për informim të UMIB-it. Mirëpo, në përgjigjen zyrtare të kthyer po atë ditë, UMIB ishte munduar ta fsheh rastin, duke thënë se po merremi me spekulime. “Konsiderojmë se pyetjet janë të karkaterit spekulativ për një situatë të mundshme hipotetike, prandaj Universiteti “Isa Boletini” nuk ka koment”, është thënë shkurt në përgjigjen e zyrës për infomim të Universitet të Mitrovicës.
Në linkun e stafit akademik të këtij fakulteti, akoma nuk figuron emri i Lumnije Thaçit, plotësim i cili pritet të bëhet së shpejti (https://umib.net/fakulteti-i-inxhinierise-mekanike-dhe-kompjuterike/stafi-akademik/)
Ndryshe, presidenti Thaçi kishte vizituar Universitetin e Mitrovicës në muajin maj të vitit të kaluar, më pak se dy muaj para se të shpallej konkursi, me ç’rast i kishte thurur edhe elozhe.
“Tani ky universitet po zbaton kriteret dhe standardet më të larta të edukimit, ka marrë një vlerësim shumë të lartë edhe nga agjencioni i akreditimit…”, kishte thënë presidenti Thaçi me rastin e vizitës së bërë në këtë universitet më 19 maj të vitit të kaluar.
Kujtomë se Rektori i Universitetit të Mitrovicës, Alush Musaj, ishte zgjedhur sekretar i Degës së PDK-së në Mitrovicë më 19 nëntor 1999 me rastin e themelimit të kësaj dege.
Ai po ashtu së bashku me Bajram Rexhepin kishte udhëhequr edhe punimet e Kuvendit të parë Zgjedhor të degës së PDK-së në Mitrovicë, i cili ishte mbajtur më 10 maj 2000. Musaj në zgjedhjet e fundit të brendshme të PDK-së, ishte zgjedhur anëtar i Këshillit Drejtues të degës së Mitrovicës. /Veriu.info/