Disa shpërthime të gripit të rëndë të shpendëve në Evropë dhe Azi janë raportuar ditët e fundit në Organizatën Botërore për Shëndetin e Kafshëve (OIE), me të dhëna se virusi po përhapet përsëri me shpejtësi.
Sipas mediave të huaja, përcjell Telegrafi, përhapja e gripit të shpendëve shumë patogjenik, që zakonisht quhet gripi i shpendëve, ka vënë në gatishmëri industrinë e shpendëve pasi shpërthimet e mëparshme çuan në asgjësimin e dhjetëra miliona shpendëve.
Ai po tërheq vëmendjen edhe të epidemiologëve pasi virusi mund të transmetohet te njerëzit.
Kina ka raportuar 21 infeksione njerëzore me nëntipin H5N6 të gripit të shpendëve deri më tani këtë vit, më shumë se në të gjithë vitin 2020.
Ndërkohë Koreja e Jugut raportoi një shpërthim në një fermë me rreth 770,000 shpendë në Chungcheongbuk-do, tha OIE të hënën, duke cituar një raport nga autoritetet koreano-jugore.
Të gjitha ato u therën.
Gjithashtu në Azi, Japonia raportoi shpërthimin e saj të parë të sezonit të dimrit 2021, në një fermë shpendësh në veri-lindje të vendit, tha OIE, duke konfirmuar një deklaratë javën e kaluar nga ministria e bujqësisë e Japonisë. Serotipi në këtë shpërthim ishte H5N8.
Në anën tjetër në Evropë, Norvegjia raportoi një shpërthim të gripit të shpendëve H5N1 në rajonin Rogaland në një tufë prej 7,000 zogjsh, tha OIE.
Gripi i shpendëve qarkullon natyrshëm midis shpendëve të egër dhe kur ata migrojnë në dimër, sëmundja mund të përhapet te shpendët dhe zogjtë e tjerë.
Qeveria belge e vendosi vendin “në rrezik të shtuar” për gripin e shpendëve, duke urdhëruar që shpendët të mbahen brenda që nga e hëna, pasi një variant shumë patogjen i gripit të shpendëve u identifikua në një patë të egër pranë Antwerpen.
Kjo pasoi një lëvizje të ngjashme në Francën fqinje në fillim të këtij muaji dhe në Holandë në tetor.
Në fillim të këtij muaji, një zonë për parandalimin e gripit të shpendëve u shpall në të gjithë Britaninë e Madhe, duke u kërkuar ligjërisht të gjithë mbajtësit e shpendëve të ndiqnin masa të rrepta të biosigurisë pasi një tufë shpendësh u asgjësua pranë Dundee në Skoci në përgjigje të një shpërthimi të gripit të shpendëve.
Gripi i shpendëve mund të prekë njerëzit në raste të rralla nëse njerëzit prekin zogjtë e infektuar, jashtëqitjet ose shtratin e tyre, ose gjatë përgatitjes së shpendëve të infektuar për gatim. /Telegrafi/