“Ekziston një datë e rëndësishme, 19 maji, kur duhet të shlyejmë miliarda euro borxh. Deri atëherë kemi lekë, por më pas nuk e dimë”, ka pohuar Papaconstantinou.
Pikërisht në momentet kur Athina po negocion me FMN dhe BE, ministri u ka bërë thirrje qytetarëve që të mos kenë frikë nga ardhja e këtyre borxheve.
Por edhe në këtë drejtim shteti helen po has probleme për shkak të kundërshtimeve të kancelares gjermane Angela Merkel, e cila ka deklaruar se Greqia duhet të tregojë se ka aftësi të rikthehet në rrugën e duhur.
Komisioni Evropian ka paralajmëruar edhe një herë për nevojën e ndihmave të shpejta financiare për Greqinë e cënuar nga falimentimi.
Zëvendëspresidentja e BE-së dhe komisarja për Drejtësi Viviane Reding paralajmëroi nga mundësia e efekteve zinxhir me pasoja katastrofale ekonomike për tërë Evropën, në qoftë se nuk ndihmohet qeveria në Athinë.
Kjo vlen në radhë të parë për Gjermaninë, bankat e së cilës janë garantët kryesorë. Ministri grek i Financave Giorgos Papakonstantinou tha se vendi i tij deri më 19 mai ka nevojë për ndihma në vlerë prej nëntë miliardë euro.
Kancelarja gjermane Angela Merkel dhe ministri i Financave Wolfgang Schäuble kanë deklaruar se vendimi për ndihma financiare do të merret pas përfundimit të negociatave mes BE-së, FMN-së dhe qeverisë greke.