Qeverisja e Agim Aliut në Ferizaj hapësirë mjaftë të madhe i ka dhënë fuqizimit të gruas në vendimmarrje. Në shumicën e sektorëve nëpër institucione publike dominojnë gratë, madje shumë prej tyre janë në krye të institucioneve. Në sektorin e Administratës komunale dhe në sektorin e Arsimit përfshirë edhe shkollat, sipas drejtuesve të Komunës, gratë ferizajase janë fuqizuar në masë të madhe.
Po ashtu gratë në këtë komunë janë numër një në Republikën e Kosovës sa i përket bashkëpronësisë dhe kjo flet për afirmitetin, mbështetjen e pastaj edhe për sensibilizimin që ka bërë qeverisja e Aliut duke i dhënë më shumë të drejta grave se sa meshkujve.
Në një intervistë për Telegrafin, i pari i komunës së Ferizajt, Agim Aliu, ka thënë se gratë kanë treguar rezultate të larta në vendimmarrje, madje në shumë sektor ato dominojnë për nga numri i të punësuarve.
Sipas Aliut, edhe pse mbështetja ndaj gruas ka qenë mjaftë dimensionale, qeverisja e tyre po bën përpjekje që ato të fuqizohen edhe më shumë në ardhmen në vendimmarrje.
‘’Fuqizimi i gruas nga mbështetja jonë si qeverisje ka qenë shumë dimensionale. Në vendimmarrje përmes mbështetjes në përgjegjësitë publike, ku kanë udhëheqje të drejtorateve politike këtu në Komunën e Ferizjet. Pastaj në nivele të sektorëve mbizotërojnë femrat si në administratën komunale, por gjithmonë ne e shohim këtë si një lloj pamjaftueshmërie edhe për shkakun se e kemi një dëshirë më të madhe për të bërë edhe më shumë dhe që për të pasur më shumë gra udhëheqëse në pozita të tilla publike edhe për shkak të mirëmenaxhimit dhe për shkak të një përgjegjësie më të lartë që e manifestojnë në natyrën e punës së tyre’’, ka thënë Aliu.
Sipas tij, një mbështetje e tillë për gratë po cilësohet si një mbështetje për vetë qeverisjen lokale shkaku i qeverisjes së mirë dhe benefitet që i sjellin sektorëve të caktuar gratë ferizajase.
Aliu bën me dije se gratë e kësaj komune e kanë mundësinë të marrin subvencione për ta zhvilluar biznesin dhe për t’u punësuar.
‘’ Sektori i arsimit gjithmonë ka qenë një sektor i mbështetur dhe sektor i dominuar nga gratë dhe vazhdon të jetë, por gjithmonë e shohim një lloj pamjaftueshmërie, për arsye se kemi qëllime dhe dëshira më të larta për të bërë më shumë edhe në aspektin biznesor. Ju e dini që Komuna e Ferizajt ka qenë komuna e vetme në Republikën e Kosovës e cila të gjithë fondin, qind për qind të fondit, për
Zhvillim dhe për punësim e kemi ndarë për gratë dhe madje kemi thjeshtësuar procedurat e aplikimit në masën minimale sa për të pasur vetëm pothuajse një letërnjoftim për të aplikuar dhe për të marrë subvencione nga Komuna e Ferizajt’’, ka thënë më tej Aliu.
Aliu shpjegon se si qeverisje kanë dashur që me çdo kusht t’i mbështesin gratë dhe t’i fuqizojnë ato në vendimmarrje.
‘’Unë për këtë jam i lumtur edhe kur kemi zhvilluar panaire të ndryshme i kam vizituar shumë prej tyre që të jemi të kënaqur kur kam parë që mbështetja jonë është përkthyer në punë, angazhim dhe mirëqenie të tyre, por mbi të gjitha edhe në një afirmim të pozitës së tyre në shoqërinë, sepse e dimë ne në aspektin e një tradite dhe një historie që është tashmë pothuajse e kaluar gjithmonë kemi pasur një ngecje të këtij përfaqësimi dhe një ngecje të këtij aktiviteti ose këtyre aktiviteteve që përfshijnë gratë’’, ka bërë me dije Aliu.
Aliu, shpjegon se Ferizaj ka ndryshuar, përveç të tjerave edhe në transformimin e projekteve të përgjithshme por edhe në transformimin social.
‘’Jam shumë i lumtur që kjo që kjo ka ndodhë dhe që gratë gjithnjë e më shumë i kemi në angazhime që i bëjnë përmes punëve dhe përgjegjësive publike, por qoftë edhe përmes mbështetjes që ne i kemi bërë në kuadër të mbështetjes për subvencione e po ashtu ende vazhdon Ferizaj të jetë lider sa i përket bashkëpronësisë. Pra, gratë në Ferizaj janë numër një në Republikën e Kosovës sa i përket bashkëpronësisë dhe kjo flet për afirmitetin dhe mbështetjen e pastaj edhe për sensibilizimin që ne e kemi bërë që ato të marrin më shumë të drejta se sa meshkujt dhe kjo është e mirë për shoqërinë e veçanërisht për Ferizajn’’, ka shtuar Aliu. /Telegrafi/