Primoz Gliha pritet të emërohet trajner i Përfaqësueses së Kosovës për ndeshjet e mbetura të kualifikimeve për Euro 2024.
Trajneri slloven prej vitesh punon në FFK, ku ka pasur disa pozita menaxheriale.
Telegrafi ka mësuar se Glihës i është besuar që të drejtojë Kosovën në sfidat e mbetura, derisa do të ketë në staf edhe dy trajnerët me emër në futbollin kosovar, Afrim Tovërlanin (aktualisht trajner te Kosova U21 dhe Arbnor Morinën (aktualisht trajner te Kosova U17).
55-vjeçari ka drejtuar Përfaqësuesen e Kosovës menjëherë pas shkarkimit të ish-trajnerit Bernard Challandes në nëntor të vitit 2021.
Gliha e drejtoi Kosovën në ndeshjen miqësore ndaj Jordanisë në Prishtinë ku në atë sfidë Dardanët pësuan humbje me rezultat 0-2.
Ndërkohë vetëm katër ditë pas humbjes nga Jordania, Kosova nën udhëheqjen e trajnerit slloven kishte arritur një barazim të madh në Athinë përballë Greqisë me rezultat 1-1.
FFK pritet që gjatë ditëve të ardhshme të zyrtarizojë emërimin e përkohshëm të trajnerit slloven. /Telegrafi/