Gjykimi për shkatërrimin e materialit zgjedhor në zgjedhjet lokale të vitit 2013 “Titanik 3” vazhdon më 18 nëntor, pasi që në seancën e sotme u prononcua i akuzuari Ismet Guri.
Për seancën e ardhshme, Gjykata dha urdhër që të sigurohet dëshmitari, për të cilin është raportuar se ka adresë në Gjermani, kështu që nëse nuk mund të sigurohet prania e tij personale të merret në pyetje përmes video lidhjes konferenciale.
Ismet Guri pas seancës së sotme, para mediave tha se kjo definitivisht është politike dhe se nuk ka asnjë vepër penale.
Në Titanik 3″ të akuzuar janë Ejup Alimi dhe Ismet Guri nga BDI-ja, të cilët ngarkohen se si anëtarë të Komisionit Zgjedhor Komunal në Çair në zgjedhjet lokale të vitit 2013 kanë shkatërruar material zgjedhor.
Procedura filloi sërish më 15 mars të këtij viti pas emërimit të gjykatës Marija Kletniçka për gjykatëse të re në këtë lëndë, pasi gjykatësja Ole Ristova , e cila e ka udhëhequr rastin, në shkurt të këtij viti ka kërkuar largim nga rasti.