Gjykata Kushtetuese e Kosovës e ka shpallur të papranueshme kërkesën e presidentit të Republikës së Kosovës, Hashim Thaçi, rreth kompetencave kushtetuese të tij dhe Kuvendit të Republikës së Kosovës, siç është përcaktuar me nenin 113.1 të Kushtetutës.
Në kërkesën e tij Presidenti thekson se pretendimi për konflikt të kompetencës së kushtetueses ndërlidhet me kompetencat kushtetuese të përcaktuara për Presidentin dhe Kuvendin në nenin 18 (Ratifikimi i Marrëveshjeve Ndërkombëtare) të Kushtetutës.
Presidenti, si palë që ka ngritur pretendim për konflikt në mes Presidentit dhe Kuvendit pretendon paqartësi rreth kompetencës kushtetuese për ratifikimin e Shkëmbimit të Letrave në mes Republikës së Kosovës dhe Bashkimit Evropian.
Gjykata në aktvendimin e saj shkruan se kërkesa e Presidentit të Republikës së Kosovës për konflikt të pretenduar në mes të kompetencave kushtetuese të tij dhe Kuvendit të Republikës së Kosovës shpallet e papranueshme për shqyrtim në merita për arsyet e elaboruara në këtë Aktvendim për papranueshmëri.
Aktvendimin e plotë të Gjykatës Kushtetuese mund ta gjeni KËTU
Kujtojmë se Presidenti, me 4 shtator 2018 i kishte dorëzuar Gjykatës Kushtetuese kërkesën për interpretimin e nenit 18 të Kushtetutës./Telegrafi/