Gjykata më e lartë gjermane vendosi sot se partia e vogël e ekstremit të djathtë Die Heimat (partia Die Heimat) nuk do të marrë fonde shtetërore për gjashtë vitet e ardhshme, sepse i konsideron vlerat dhe qëllimet e saj jokushtetuese dhe synon të shfuqizojë demokracinë.
Gjykata Kushtetuese Federale tha se partia, e njohur dikur si Partia Kombëtare Demokratike e Gjermanisë (NDP), “shpërfill rendin themelor demokratik” dhe se qëllimet e saj dhe mënyra se si sillen mbështetësit e saj janë “të drejtuara drejt eliminimit të demokracisë”.
Nënkryetarja e gjykatës, Doris Koenig, tha se vendimi është marrë unanimisht, pasi koncepti politik i partisë nuk është në përputhje me garantimin e dinjitetit njerëzor, siç e përcakton kushtetuta gjermane.
Gjykatësi njoftoi se partia Die Heimat i përmbahet konceptit etnik të identitetit gjerman dhe idesë se komuniteti shtet-komb bazohet në origjinë, raporton euronews.
“Promovimi i një komuniteti të përcaktuar etnikisht dërgon në neglizhencën e të huajve, emigrantëve dhe pakicave, gjë që cenon dinjitetin njerëzor dhe parimin e barazisë elementare ligjore”, tha Koenig.
Qeveria gjermane dhe të dy dhomat e parlamentit e dërguan partinë në gjykatë dhe paraqitën prova se Die Heimat është një organizatë raciste, që propagandon ideologji anti-myslimane dhe antisemitike dhe refuzon transgjinorët.
Kreu i partisë Frank Franz e minimizoi vendimin, duke thënë se megjithëse nuk ishte i mirë për partinë e tij, ai nuk do të përjashtohej ose ndalohej.
Partitë politike në Gjermani marrin mbështetje financiare kryesisht në bazë të përfaqësimit në parlament.
Politikanët kryesorë gjermanë kanë diskutuar gjithashtu kohët e fundit përpjekjen për të ndaluar ose ndërprerë fondet shtetërore për një parti tjetër të ekstremit të djathtë, Alternativa për Gjermaninë (AfD), e cila po rritet në popullaritet kohët e fundit. /Telegrafi/